李綺雯謝「煮」隆恩偷師開Cafe
藝人李綺雯（𡃁妹）、黎紀君及盧頌恩（妹頭）主持、以咖啡店為主題的節目，𡃁妹直言今次奉旨偷師，為日後自己開cafe取經。黎紀君經常準備甜品「娛賓」，令o靚妹又食又拎，台前幕後氣氛相當愉快。
𡃁妹、黎紀君及盧頌恩為77台香港開電視主持的節目《開間咖啡店》，將於9月20日星期日晚上10時30分推出。節目內，3位靚女走訪全港特色咖啡店取經，除了拜訪專業咖啡師鑽研有關咖啡學問外，更會「開班授徒」，教觀眾整甜品及輕食，希望透過咖啡香味及美食，讓都市人放鬆心情，達到安撫心靈的效果。
黎紀君炮製甜品
談到今次主持節目，𡃁妹表示：「其實我都好想開cafe，所以之前有上關於咖啡嘅課堂。今次拍外景真係學到好多嘢，取經之餘又歎到唔同種類嘅咖啡，可以話一舉兩得。」對於首次與黎紀君及盧頌恩合作，𡃁妹說：「大家好夾，黎紀君主要負責整甜品，搞到我歎咖啡之餘又有甜點慰藉，真係好開心。我就負責整主食同小食，因為要迎合每集唔同嘅主題，我又想整嘅嘢食特別啲，所以專登諗啲新菜式，同埋上網搵資料，而且每個菜式重複煮好多次，希望不斷改良。好彩大家都話好味，我嘅心血冇白費。」
務求「眼睛食先」
𡃁妹笑言自己下廚一向「分量十足」，但今次要配合咖啡店的氣氛及擺設，要減量及鑽研擺盤，務求做到菜式精緻，以「眼睛食先」來吸引觀眾。節目最後一集，𡃁妹會邀請朋友以顧客身份，品評她們「咖啡店」的出品：「所以心情有啲緊張！總括嚟講，今次除咗係主持一個節目外，仲會係我將來投資開設自己cafe嘅預習，好多謝製作隊畀今次機會我。」
盧頌恩歎出高層次
盧頌恩（妹頭）表示拍攝香港開電視節目《開間咖啡店》獲益良多：「我對咖啡認識深咗好多，尤其係手沖咖啡原來可以同品酒一樣，去到好高層次。」
妹頭透露走訪咖啡店期間，認識一位老闆，開設咖啡店旨在推廣文化：「佢仲補貼員工去學習咖啡學問，同埋出錢送佢哋去歐洲參加比賽。佢話一個旅程至少要幾十萬，我問佢驚唔驚啲員工留唔耐，佢竟然答『如果真係教曉徒弟冇師傅，呢啲人留嚟都冇用』，我覺得佢簡直係清泉呀！」經營按摩店的妹頭坦言以對方為學習榜樣，希望自己亦能跟員工打成一片。
播映日期
9月20日起，逢星期日晚上10:30播放
頻道：免費電視77台香港《開》電視