麥長青開舖諗後路撈埋幕後寫劇本

多年來不時投資生意的藝人麥長青(麥包),疫情下仍與拍檔開舖售賣日本高級食材,全家人亦懶理負面消息,每日落舖吸客。打從去年中開始幾近沒有幕前工作的麥包坦言:「無論如何生活要繼續,飯亦要食,我年紀開始大,要幫自己計算人生喇,總之有機會就要去試!」

「一人搵錢、四人生活」,麥包的壓力可想而知,幸一家人相當團結,他說:「我數口差,以前月尾冇錢就碌卡度日,錢嘅嘢交晒畀太太處理,依家見自己零用錢少咗就知乜事!不過我做乜嘢,太太都會支持。個女本來喺澳洲讀書,返咗嚟亦主動落嚟幫手,佢話:『難得人哋畀機會爸爸,報恩都要啦!』我成日都話,冇嘢可以打低我,除咗屋企人。」

麥包離開無綫後發展不俗,想不到所有工作突然全部「報銷」,他說:「傾咗3、4部電影同2部網劇,本來度晒期北上開工,結果疫情一拖再拖,人哋最終決定易角!依家肯做都未必有機會,但我相信天無絕人之路,好似我今次開舖,感恩好多朋友撐場同幫手宣傳,好快已經有回頭客,仲有個身在加拿大嘅粉絲專登打嚟訂貨,請喺香港嘅朋友食。」

笑言「未餓死」

回顧多年來拍戲兼從商,麥包笑言「未餓死」,全因演藝事業以外的工作收入不錯:「好搞笑係當年我喺台慶得獎,樂小姐(樂易玲)同我傾約,當時我租緊兩萬幾蚊嘅樓住,但人工得萬幾,佢問我點生存?」話雖如此,他仍鍾情娛圈工作,近日更着手寫劇本:「冇錢請人寫咪自己做囉,慳啲嘛!」