陳欣妍中六SheShe初戀冇得touch
藝人陳欣妍（Shirley）以「Kai」形容自己那些年，讀書時最自豪是一日之內完成暑期作業，另為達成初戀任務，竟跟學妹柏拉圖式拍拖一個月！到畢業時，其願望竟是將來與同學夾份買姑婆屋！想當年每日趕返學跑到氣咳，Shirley再一次走在西營盤，回味青葱歲月。
高街鬼屋 唔係講玩
讀幼稚園起，陳欣妍就在西營盤居住，對該區非常熟悉，堪稱地膽！她透露正街、第二街、第三街以及高街都住過：「高街就住得最耐，由中一住到中學畢業，當時屋企對面就係以前人稱『高街鬼屋』嘅社區綜合大樓。」自認膽小鬼的她，初中曾跟朋友於晚上偷偷潛入大樓探險，最後嚇到落荒而逃：「我係畀朋友逼去探險，探險前上高街鬼屋網，睇完入面嘅故事先去，心理上更恐懼。我去到後樓梯就聽到有把女聲『唉』咁叫，我嚇到尖叫，跟住就跑走咗。」她懷疑當年被整蠱，但仍奉勸大家：「唔好去探險，冇嘢唔好搵嘢搞！」
賴床懶蟲 朝朝喪跑
Shirley中小學都讀聖士提反女校，離家約十分鐘路程，為趕返學而激發出運動細胞：「我每日都好遲起身，日日都係跑返學，跑足13年！小學都有紀律啲，係媽咪送返學，中學就自己返，我記得學校係朝早八點十分打鐘上堂，我八點先踏出家門，仲要花時間等電梯，只有八分鐘時間跑斜路趕返學，但我冇試過遲到，運動細胞應該係咁訓練番嚟。」
笑過哭過 成就解鎖
Shirley又笑言求學時期太乖，青春偶像劇的反叛情節或轟轟烈烈的愛情，從未發生過在她身上，只有一段短暫的「所謂初戀」：「中六同過一個低我一級嘅學妹拍拖，因為就快畢業，仲未拍過拖覺得爭啲咁。我哋拍咗一個月，大家會一齊返學，放學會一齊去自修室，但冇拖過手又冇錫過。後來我要考A-Level，佢就同咗另一個女仔一齊，我都有喊咗一陣，跟住覺得我嘅青春有開心過、有喊過，任務達成！」
上堂畫畫 A級摩打
至於當年最大壯舉，就是一天之內畫了近七十幅素描：「我讀視覺藝術，當時每日要交一幅素描，一個暑假過後要交七十張，但我冇畫，第一日返學，花咗全日上堂時間，喺不被老師發現嘅情況下畫晒七十張交功課，仲攞埋A，我覺得自己好叻，喺時間限制下逼出潛能，壓力令人進步。」
畢業願望 買姑婆屋
由於父母管教嚴，Shirley每日放學只有兩個蒲點，第一個是書店：「間書店喺學校對面，裝修有啲英倫懷舊風，近年好多電影同電視劇都喺入面取景，所以出咗名，成為打卡位。以前我會同同學花一個下午喺度睇書同飲咖啡，好relax。」
至於另一蒲點就是學校附近的糖水舖：「所有聖士提反嘅學生都知道呢間舖，大家對佢都好有感情，一放學就會過嚟飲嘢。我哋有個傳統，中學畢業前最後一日放學會過嚟飲下午茶，跟住就會用紙巾寫上大家嘅願望再釘喺牆上面，好多人都會寫『畢業後一齊買姑婆屋』！我當年都有寫過。」