謝嘉怡探鄉親 被封「東莞榮光」

謝嘉怡網晒與有型爸爸的合照。

謝嘉怡當選港姐冠軍後一夜成名，但生活仍相當貼地，得獎後忙於出席領獎活動，仍不忘抽時間陪家人。昨日她於社交網上載與「頭號粉絲」、年輕有型的爸爸撐枱腳合照，穿白Tee、工人褲的她素顏上陣，一臉純真，卸下化妝起了減齡作用，十足鄰家女孩。

狂食當造龍眼

由參選至今，她經常將香港地道美食掛嘴邊，得獎當晚第一時間表示要食排骨飯。昨日她現身大埔食龍眼，非常為食。據知，在蘇格蘭長大的嘉怡原籍東莞，故昨日趁有空即與父親到東莞同鄉總會大埔分會「探親」，獲鄉親熱情招待，奉上當造龍眼讓她大飽口福。接觸過她的鄉親都對嘉怡有讚冇彈，形容她為「東莞榮光」。嘉怡事後受訪表示：「我啲長輩喺大埔住咗好耐，爺爺仲喺呢一區經營過雞粥生意，我每年返嚟都會探嫲嫲，所以對大埔好有印象。」又指爸爸於大埔出世及成長：「我兩歲第一次去大埔，對我嚟講呢度係第二個家。（你好鍾意食龍眼？）我真係好鍾意食。」她透露爸爸下星期返蘇格蘭，故把握時間相聚。

謝嘉怡與父親返大埔，獲親友熱情款待。

黃婉恩出海耍樂，未有因落選而影響心情。

黃婉恩險走光

另外，今屆落選佳麗黃婉恩已收拾心情，相約藝人陳約臨出海耍樂，再次以三點式泳衣上陣「派軍糧」。不過可能忙於擺甫士，黃婉恩的泳衣竟有少許「離罩」，幸未有走光。其勻稱身形吸引網民留意，紛紛鼓勵她入行做藝人。