湯怡自爆有人追
視帝王浩信在新劇中男女通咀，與蔣家旻激情咬嘴唇一幕更掀起話題，但他笑指艷福背後要忍痛！而劇中「情敵」甚多的湯怡，表明戲裏戲外都拒與人爭男友，並自爆與追求者「認識中」。
藝人王浩信、張振朗、馮盈盈、湯怡及高海寧等昨日現身劇集《反黑路人甲》的宣傳活動，湯怡自言性格跟角色相似，不會跟人爭男友：「係我嘅就唔使爭，如果個心唔喺我度，爭嚟都冇意思。（有冇試過？）好在冇。我係一個好冇安全感嘅人，希望可以搵到一個令自己有安全感嘅人，要知對方行蹤。（會唔會檢查對方手機？）唔會，最基本係對大家有信任，試過身邊有朋友睇完男友手機，真係有啲嘢，我寧願唔睇，寧願佢呃我一世。」問到現時有否追求者，她坦言有朋友介紹異性給她：「認識中，唔會為拍拖而拍。（唔揀圈中人？）冇特定。（可能同前度洪卓立復合？）呢個唔答啦！」
張振朗最緊要忍笑
提到前日播出的一集中，王浩信被蔣家旻咬嘴唇，畫面刺激，他說：「呢個動作好切合佢個角色，因為係喜劇，所以希望畫面上有啲突破。（事前有乜準備？）準備忍痛。」除了咀女，浩信跟張振朗在劇中亦有吻戲，他笑說：「同女人拍會有啲尷尬，同佢就唔會，仲有好豐富嘅設計，為咗呢場戲拍多咗一日。（錫咗幾次？）我唔想回想。（邊個做主動？）係我舂個頭埋去，口感幾新鮮，未試過。」而振朗坦言拍畢後也有回想這幕，問到在拍攝時有甚麼反應：「我當時有撳住自己唔好笑，否則又要拍多日。（錫完王浩信，女友有冇唔畀你錫？）冇，好多人都好期待睇。」另外，王浩信被問到太太陳自瑤之前生日，在社交網中唯獨沒有回覆他的生日祝福留言，他聞言即落閘：「呢個唔講。」