青雲重裝拆彈「核爆機場」超震撼

由邱禮濤執導的電影《拆彈專家》，2017年於香港及內地取得好成績，寰宇電影本年底將推出《拆彈專家2》，該片以全新故事展開，由影帝劉青雲夥拍憑電影《金陵十三釵》冒起的內地女星倪妮主演，加上謝君豪、姜皓文等多位好戲之人，陣容鼎盛！

該片預告日前曝光，繼首集炸毀以1:1搭建的紅隧後，今次加入「核彈」元素，其中「炸機場」一幕更震撼力爆燈！邱禮濤亦讚青雲與倪妮非常專業：「青雲着咗戲服就唔捨得除，因為拆彈戲服好重型，好焗好熱，但佢一開工就算拍完都唔會除住，要我叫三次先肯行去除，真係好敬業嘅演員，演技就更加唔使多講啦！」

要求唔用替身

至於首度合作的倪妮，邱禮濤指對方拍得很投入，不少危險場面都願意親身上陣：「試過有場戲要吊到五、六層樓高，佢都親身上陣，有一場大爆炸戲，佢主動話想唔用替身，但我哋對爆破好有經驗，一爆之下，根本冇可能睇到任何嘢，無謂要佢做啲冒險但出嚟又唔會有效果嘅嘢，要係咁勸佢先冇去做。」