李佳芯少少鹹誘熟男幻想

李佳芯識做地讚陸永「特別」，有吸引之處。

李佳芯（Ali）、陸永、關楚耀及馮盈盈等，昨日出席由資深製作人陳翹英編審和監製的新劇《智能愛（AI）人》拜神儀式，Ali在劇中飾演機械人，跟馮盈盈爭奪陸永，她表示演機械人不容易，仍在摸索中，又自嘲「年少無知」才愛上陸永：「劇情講我乜都唔識，去咗陸永屋企，佢屋企得兩個男人，一個係陸永，一個就係蔣志光。（劇中陸永對你有幻想？）好似係蔣志光對我有幻想，少少鹹多多趣！」問到陸永是否合作過的男對手中最其貌不揚的一位？她識做地說：「唔好咁講，佢都靚仔，都OK，有佢吸引之處，係特別嘅對手，特別搞笑！」

• 李佳芯（左）在新劇演機械人，與馮盈盈爭奪陸永。

陸永做「男一」認樣衰

至於初嘗「男一」滋味的陸永謙稱自己只是男角色，對於被兩女爭奪，他笑說：「爭啲乜！佢哋爭我嘅戲份，我都唔在場。（有冇親熱鏡頭？）冇激情戲。（如果Ali同盈盈只能揀一個，揀邊個？）Ali喺劇中係機械人，冇激情配件。」又指劇本寫他的角色是外表極其俊朗，笑言擔心監製找錯人。對於Ali指他「特別」，他說：「通常唔靚仔咪話佢特別，唔特別就話佢好人，咁即係認我好樣衰啦！」

另外，相隔兩年再拍劇的關楚耀大感興奮，他表示角色神經質得來又奸，可攞正牌發洩。