陳欣妍瞞沈震軒激咀印男
新一代「ViuTV女神」陳欣妍日前無懼疫情為擔正新戲開工，除了力谷34C上圍「壓場」外，更自爆在沒有向男友沈震軒備案下，與印度籍男主角成家宏（Karan Cholia）車廂激吻，獻出第一次給對方！
由陳欣妍（Shirley）主演的印度電影《我男友係好差》，因疫情一度停機，直至近日終排除萬難復工。Shirley日前夥張建聲、楊卓娜及岑珈其等演員為電影開工，其中Shirley以低胸露腰的印度服飾登場，勁晒「線」頭及24吋小蠻腰，艷壓全場！她透露電影的印度團隊因簽證問題需返印度，故即使疫情持續，也不能再延遲拍攝。
講及戲中難忘事，Shirley自爆獻出銀幕初吻：「我喺的士上同印度男主角激吻，唔係蜻蜓點水，仲要我做主動！我哋都好緊張，今次係我第一次同外國人咀。（事前同男友沈震軒講咗？）冇呀！拍完之後先同佢講，佢個反應就話好！佢一直都好支持我嘅工作，仲讚今次個造型幾靚。」又指首次與外國人合作，留意到印度人的小習慣：「我發現印度男人講嘢個頭就會郁一郁，覺得幾得意！」揚言希望憑這部電影成功打入寶萊塢市場。
張建聲突然脹爆
至於飾演Shirely追求者之一的張建聲，對兩人未有親熱戲感可惜，但不忘讚對方專業：「Shirley每日差唔多拍廿個鐘，嚟開工都好精神，大家氣氛好開心。」他又自爆最近身形變脹，全因扁桃腺嚴重發炎：「最近發燒感冒多咗，睇醫生發現我天生扁桃腺偏大，好容易發炎！我試過一個月發病兩次，好辛苦，醫生建議我切咗佢，但手術後會冇咗第一道防線，患重病機會變高，睇定啲先。」