張兆輝擁別子女 眼紅紅呻空虛
張兆輝一對子女留學英國，經過半年停課後，兩人前晚返當地準備開學，身為廿四孝老竇的張兆輝特別到機場送行，期間對愛女Twiggy照顧有加，入閘前一家人更緊緊擁抱，他不忍離別而雙眼通紅。
藝人張兆輝與太太郭碧妍育有一對子女張卓鏗與張卓姿（Twiggy），兩人自3月從英國返港後，與父母相處半年，直到前晚飛返當地為9月開學作準備。張兆輝視一對子女如命根，Twiggy上月16歲生日，一家四口齊齊為她慶生，得知女兒想食魚蛋粉，面對「禁聚令」仍外出隔枱陪食，並上載有趣相片。
幫手推行李 為囡囡撥髮
經過疫情下的半年親子悠長假期，如今要送別子女返英國，張兆輝當然很不習慣，笑言要用幾個星期才可適應！這位廿四孝老竇特別到機場送行，期間對Twiggy照顧有加，除了幫手推行李外，排隊時又為女兒撥頭髮，子女入閘前三人緊緊擁抱，張兆輝更忍不住眼紅紅。
子女不在身邊，張兆輝受訪表示要寄情工作：「有開工好啲，可以平衡吓心理，但都空虛(口架)！我隻小狗都唔開心，但都要慣嘅！佢哋今次早咗返去，因為要搞學校宿舍，又要預時間隔離。（叮囑？）準備好晒啲雨衣、面罩咁啦！（帶多防疫用品？）都係口罩，夠幾個月用，畀埋啲有需要嘅同學啦！我個女需求唔大，佢經常喺宿舍，仲有啲藥物、維他命咁看門口！我個仔都大，幫細妹處理晒。佢好生性，唔想靠上網上堂，因為知道畀咗咁多錢，返去上堂有唔明可直接問老師！（聖誕再返？）阿仔可能未必返，個女就會返，但我聖誕節要開工，希望到時疫情受控可以自由出入，如果見唔到就靠視像啦！（太太冇嚟送行？）佢整親腳，有嚟但喺車，佢哋有擁抱(口架)！有哥哥照顧妹妹，我哋都放心，但我冇用啲囉，適應唔到仔女唔喺身邊！」
陳敏之被飛：都係咁做！
問到新劇《飛虎3》拍檔陳敏之被指因政治立場而改由陳煒頂上，合作演夫妻的張兆輝表示不知情：「冇影響，都係咁做！今次呢個太太角色好硬朗，同陳煒都好似！（敏之要照顧小朋友？）其實我哋開工都係冒險去拍，但冇可能停，大家都有憂慮，如果一個有事就拖累全組，咁敏之有個小朋友嘛，唔通你唔開，要全組人等你一個咩！」