侯嘉欣估唔到被Out佳麗攬實陪喊

侯嘉欣久久未能平復心情，講起出局又喊過。

《2020香港小姐競選》將於本月30日舉行決賽，大會昨日公布晉級12強名單，賽前大熱「女版金宇彬」陳楨怡、「港版子瑜」郭柏妍、何孟珊與「狂野空姐」廖慧儀等齊齊順利過關，還有陳煦凝、謝嘉怡、羅雪妍、鄺美璇、源菲然、麥詩晴、黃婉恩及謝恩靈入圍，三位被淘汰佳麗分別是張盈悅、賴琦媛及侯嘉欣！賴琦媛入圍以來是非不絕，曾被爆吸煙及亂拋垃圾，被Out一刻仍保持微笑；近日無辜捲入「利誘」拉票風波的侯嘉欣，可能預計晉級危危乎，公布前發表感言時已變喊包，當宣布一刻更加失落，與其他佳麗攬實一齊喊，依依不捨。

張盈悅出局 仲識搞Gag

三位淘汰佳麗齊齊受訪，賴琦媛被問到是否受負面新聞影響選情？她說：「我得20歲，人生仲有好長，未諗下年會唔會再參選，但都想喺TVB發展。（戒煙？）其實我戒咗啦！總之出咗新聞嗰日後就冇再食煙。」更自薦做戒煙大使。而侯嘉欣仍未平復心情，坦言沒想過被淘汰：「我覺得表現都OK，可能被新聞影響咗。（覺得自己輸咩？）除咗新聞之外，可能個樣唔夠靚。」旁邊的張盈悅竟爆出一句：「你都靚過侯賽因（電影《賭俠》單立文飾演的角色）嘅！」張盈悅則指自己花太長時間進入選美狀態，若然找到工作便不會返美國。

宣布侯嘉欣被Out時，其他佳麗即上前安慰。	賴琦媛（右）與張盈悅無緣進身12強，前者坦言有意明年再選！	賽前大熱陳楨怡與郭柏妍（右）順利入圍。

因侯嘉欣出局而落淚的何孟珊，坦言不捨得對方：「明白賽果係會意想不到！（覺得佢係受負面新聞影響出局？）應該冇關係，佢表現得好好，希望『高妹組』繼續有得留低，見住走了一個又一個，都幾傷感。」郭柏妍與廖慧儀同樣對侯嘉欣被Out感意外，廖慧儀說：「唔清楚網民同評判鍾意乜類型，侯嘉欣表現好好，講嘢又活潑，係好正能量嘅女仔。」入圍佳麗緊接現身節目《港姐見工有問題》，接受汪明荃、鄭裕玲等人考驗。