JW過檔吳業坤坐正擸資源 揼本邀蘇皓兒拍MV
歌手吳業坤（坤坤）有前師姐JW做「中介人」，成功過檔新唱片公司，本以為JW離巢他或會受牽連，但據知他已火速成為公司新寵，擸盡所有資源！例如其新歌《原始心態》的作曲、填詞及監製屬JW創作班底，MV製作費亦較一般MV貴5倍，更邀得最近人氣急升的蘇皓兒擔任女主角，另外還有張文傑及Bean Chu兩位演員參與。
唱片公司有感坤坤近年以拍劇為主，為了「重振」其歌手形象，落本成立網上音樂頻道，炮製一系列主打與素人合唱的節目，並成立官方歌迷會吸納粉絲，又聘請形象設計師洗走「貼地味」。
保持距離 唔敢集郵
坤坤日前受訪時直認新歌MV揼本：「租場要幾萬，同埋搭咗個巴士布景都唔少錢，係比3、4萬製作費嘅MV貴。蘇皓兒做女主角係公司幫我搵，因為佢呢排好紅，唱片公司老闆好好，探班都逗留咗10幾個鐘。」雖然女神在身邊，他卻錯失機會：「因為要保持社交距離，依家唔會亂咁集郵啦！」對於公司大手筆製作，他說：「多謝公司揼本，會努力不辜負期望。」
前師姐「最後MV」冇樣睇
提到前師姐JW的「最後MV」《小半生》只得兩位素人出鏡，主唱的JW有聲冇樣，坤坤即為公司護航：「嗰個MV其實好揼本，要專登搭船去荒島度拍成日，啲景好靚。」問到他是否做「一哥」？坤坤笑說：「我與世無爭(口架)！公司仲有關楚耀，佢先係『一哥』，我只係代替咗JW，做咗公司『一姐』咋！」