Kylie豹妹踩場Cardi B粉絲怒吼換人!

美國天后Cardi B與新星Megan Thee Stallion合作新歌《WAP》的MV曝光,美國真人騷家族Kardashian成員小富婆Kylie Jenner化身性感豹妹驚喜客串,不過Cardi粉絲似乎不受落,在社交網派嬲要求換人!

Kylie驚喜現身Cardi B的新歌MV,不過粉絲竟激動到在網上發起簽名運動,強烈要求刪走她的鏡頭!不足一日已有3萬多人簽名表達不滿,更有網民留言提議由98歲美國老牌女星Betty White取代Kylie演出:「依家我要睇Betty White喺《WAP》個MV度出現,係時候補拍!」由於短時間內有大批網民支持「Betty換Kylie」,令到Betty霎時間成為網頁熱搜名字,有網民直言誤以為Betty仙遊,認真大吉利是!

負評MV多人睇

Kylie客串MV被粉絲狂踩,更要求刪剪她的畫面,Cardi昨日在社交網發文提及新作,但沒有特別提及Kylie:「我想多謝參與MV嘅每一位女性!事實上,你哋肯喺檔期中花時間參與,對我嚟講意義重大!呢樣嘢對我好重要,榮幸邀請到來自不同種族同背景嘅女性,仲要好有力量同影響力。」至於Kylie未有回應事件,只分享拍攝花絮照。雖然Kylie客串被狂踩,但MV公開一日點擊量已有1,300萬人次。

另外,Kylie向來愛露肉呃Like,其化妝師Ariel Tejada日前上載Kylie穿浴袍的性感照,相中Kylie拉開浴袍,中門大開,「乳」不驚人誓不休!Ariel更留言提醒粉絲Kylie的生日快到:「就快23歲啦!」