陳曉華反應遲鈍趕走追求者
前港姐冠軍兼國際中華小姐冠軍陳曉華的處女劇出街，首次拍劇就擔正女二的她已預了會有負評，當是磨練不會介懷。工作上有新開始，感情方面卻未有着落，陳曉華現時不急於拍拖，也沒時間經營愛情，縱有追求者，亦只會把他們當作朋友！
感激前輩 提點扶持
陳曉華（Hera）處女劇《迷網》近日熱播，笑言第一胎終於出世，她忍不住在播出前已去剪片房先睹為快：「想睇自己表現，覺得有啲奇怪位嘅話，下一套劇可以做好啲，當然覺得自己有啲地方好不足，預咗有啲差嘅評價，但唔會太介意，因為要時間去學習，同埋可以令我知道邊度唔好，希望之後大家會覺得我進步咗好多。」提到第一套劇就擔演女二，可有感到壓力？她笑言：「反而估唔到拍劇咁辛苦，同埋第一套劇唔知要準備啲乜嘢，頭一兩日見到人哋準備好多，先發覺自己準備得好少。」
情緒爆發驚喊唔出
Hera很感激同劇前輩楊明及高海寧的提點：「高海寧會示範畀我睇語氣可能要點，楊明就知我好緊張，我NG就話唔緊要再嚟，有佢哋扶持覺得好warm。（NG得多？）一開始都多，每一句對白都係專業名詞，一定要成句讀得啱，一錯就會不斷錯，開始時會緊張，後來發現原來大家都會NG，所以都OK。」她又謂角色最難是後段有轉折點，要在眾多工作人員面前情緒崩潰大爆發，也不知能否喊得出，之後藉住劇情成功代入角色，總算完成使命。
圈內圈外 擇偶矛盾
作為兩項選美大賽的冠軍，Hera想必多人追求，她卻笑言：「我好男仔頭，同埋比較後知後覺，有啲人想接觸我，我會friendzone咗佢哋，之後佢哋同我講番話之前想追我，我就話我真係唔知。」提到擇偶條件，她則說：「要鍾意同我一齊打機、一齊煮吓嘢食、唔可以講大話、有責任心、鍾意我隻狗。（對外表有何要求？）外表唔緊要，靚仔係bonus，高過我1cm都OK o架喇！」
怕圈外人難溝通
提到前任狄以達是圈中人，下次可會仍選擇同行？她說：「我都有諗過呢個問題，但圈外圈內都有缺點，圈外難理解我嘅生活，圈內我又好怕花花世界好多誘惑，所以依家都係唔諗住，反正未出現呢個人，出現咗先再諗係咪真係好多缺點，依家想將時間擺喺工作上，太多嘢要學。」
克服難關 自認叻女
劇中飾演警察的Hera有大量打鬥、擒欄等動作戲，她自覺做得有點生硬，期間更不慎受傷：「有一幕講我成個人跌落地下，我又唔識就力，所以chok親條頸，成身瘀晒，條頸要成個禮拜先好番。（冇得瞓又整親好辛苦？）覺得自己好叻女，哈哈，選港姐瞓得好少，咁辛苦我都捱過以為自己好叻，點知原來可以更叻，拍劇仲辛苦，不過都enjoy過程。」劇中她是楊明的下屬，並迷戀對方，她笑言：「到最後就冇啦，同一開始有少少唔同咗，其實我本身有男朋友朱敏瀚，但之後有啲大變化。」她又笑言劇中最親密的鏡頭只有朱敏瀚吻她的面。
玩交友App遇怪人
講到劇情以網絡騙案為主題，Hera笑言自己極度小心，未試過被騙，至於網絡情緣，她亦沒試過，只是中學時曾試玩交友App：「但我同佢哋完全溝通唔到，講啲嘢好奇怪，最後我連個App都delete埋，覺得工作上或生活上遇到嗰個人先係緣分，所以都係隨緣。」現階段她不急於拍拖：「因為好忙，開始咗一段關係要用心經營先好，我唔想開始咗，但冇時間經營，冇咗就會好傷心，所以唔拍拖都好，等我ready好先啦。（事業愛情可以同步？）所以覺得嗰啲人好叻。」