劉少君麥德羅出院四圍去網民憂播毒

麥德羅與劉少君確診後住院十多日，已先後康復出院，二人昨晨相約去酒樓飲茶，並拍片上載社交網，見他們狀態甚佳。劉少君以過來人分享感受，指疫情嚴峻，叫大家注重衞生，又勉勵老人家即使染病都不要氣餒，一定醫到。他出院翌日便落街慢跑，因肺功能受損，需多做運動鍛煉。

好番有抗體

不少網民見到他們的飲茶片段，紛紛鬧爆：「有冇搞錯？為己為人應該在家休息啦，有冇腦(口架)」、「咁快走出來播毒」等。麥德羅解釋：「健康茶敍，合法二人喝，冇問題。我哋好番有抗體，唔通全港好番嘅人都播毒？」劉少君亦說：「我和麥德羅已經正式有抗體，絕對排除感染給其他人，請大家明白！今天我倆碰面是積極研究如何將心肺功能盡快回復， 還希望能夠有個良好的恢復公式……不便之處請多原諒。」

醫生建議留家

呼吸系統專科醫生陳嘉榮指確診者出院前，最少要接受兩次測試，呈陰性才可出院。若本身有抗體，再感染的機會很低，但不是100%，因為可能會有變種情況。問到剛出院即外出是否恰當？他說：「根據衞生署指引係需要留家休息一至兩星期，但唔需要同家人隔離。佢兩個曾經確診，但如果都係康復者，傳染他人情況係低，不過啱啱出院最好在家休息。」

至於確診的時裝設計師鄧達智表示身體狀況日漸好轉，前日開始停止注射藥物，但仍會發燒及發冷；其醫生伴侶陳梓欣昨日接獲通知，可離開駿洋邨，預計晚上出營。身在鯉魚門隔離營的麥德羅女友劉麗萍，昨日亦獲准出營。

另外，汪明荃昨日網晒一段在海邊散步的短片，見她冇戴口罩，有網民指政府已規定市民在室外地方需要戴口罩：「希望呢啲係舊相啦！如果係今日嘅事、喺公眾地方唔戴口罩、已經犯法喇！」