蕭正楠戒約阿媽飲茶 張秀文「獨食」求存！

新冠肺炎疫情嚴峻，政府公布的最新防疫措施中，包括食肆全日禁堂食、禁聚令收緊至2人等，措施由29日凌晨起生效，為期7日。

對於收緊禁聚令人數，張秀文直言影響不大，為了保護媽咪，她已沒見對方好一段時間：「自從母親節之後，已經冇同屋企人聚餐、見面，靠電話聯繫感情，主要係因為媽咪住喺祿泉樓附近，加上TKO都係高危地方，所以為咗安全起見，都冇去探阿媽，以免交叉感染，阿哥、家姐因為有小朋友就更加少見面，唔想有傳染。」獨居的她直言已習慣「獨食」：「多數會叫外賣或者自己整，依家全日冇咗堂食，咪叫多兩、三個外賣儲喺屋企，我對食冇乜要求，但求生存！」

簡淑兒下廚益埋好友

蕭正楠同樣為安全起見，近月減少見屋企人：「以前同媽咪一個禮拜飲一、兩次茶，依家真係唔敢，媽咪年紀大，好危險，我都叫佢盡量留喺屋企。」經常下廚的他又表示，在疫情期間研製了不少菜式，他說：「呢排喺屋企煮食多，調味料擺到成櫃都係，多到畀老婆（黃翠如）鬧，早兩日我研製咗一味雞腳畀佢食，佢呢排開工咁辛苦，畀啲骨膠原佢食，等佢愈拍愈靚。」

至於藝人簡淑兒由於父母在美國，她與同住的家姐亦減少出街，所以收緊禁聚令對她影響不大，她反而多了時間留家下廚，早前更親手整了芝士蛋糕送給生日的好友陳婉衡。另一「3日2夜」女神陳詩欣對於食肆全日禁堂食，她說：「前排有叫外賣，但依家多咗好多染疫群組可能係啲餐廳，我唔放心，次次外賣返嚟都會再煮一次或者微波爐再叮，不過覺得好麻煩，自己煮好似仲快。」

Bob擔心飲食業界

另外，楊千嬅明白現時收緊禁聚令措施，全因疫情正處於嚴峻階段，認為不論禁聚令可容許幾多人同行，最緊要是每人謹守防疫意識：「就算一個出街都要戴口罩，最好係盡量避免外出，我成家人都有呢個意識，小朋友轉咗做online class，雖然會有第二樣壓力，但都好少出外(口架)喇！」而一家六口的林盛斌（Bob）會否受收緊禁聚令影響？他說：「好似話同住處嘅家人可以豁免，不過呢段時間除咗我同太太個別有時要出外工作，全家人都唔會一齊出街，所以對我冇乜大影響，反而身邊好多朋友做飲食業，我就真係好擔心佢哋未必過到呢一關。」