美國饒舌天王Kanye West近期行為怪異，日前在總統競選集會上哭訴曾叫老婆Kim Kardashian墮胎，前日卻在社交網站留言，暗指她與男歌手Meek Mill偷食，一度想離婚！Kim忍無可忍，首度留言承認老公有問題！
被指躁鬱症發作的Kanye，日前失驚無神爆老婆與男歌手在酒店幽會：「自從Kim同Meek Mill喺Waldorf（酒店）為咗『監獄改革』而見面之後，我就打算同Kim離婚。」疑似指控老婆偷食！他坦言視Meek為朋友，更指Kim越了軌。雖然事後刪除言論，但仍被美媒廣泛報道！無辜被指「勾義嫂」的Meek隨即留言反擊：「單X嘢係大話，唔好咁啦！」似乎否認與Kim偷食。有傳媒爆料指Meek與Kim從未試過單獨見面，兩人雖曾一起出席於洛杉磯舉行的監獄改革論壇，但與女商家在餐廳見面後，Kim被目擊獨自離開。有傳Kim早知老公因此事呷醋，夫婦亦就事件傾談過。
連日來封嘴的Kim前日終於忍無可忍留言，首度回應老公的問題：「你哋好多人都知道Kanye患有躁鬱症。任何人患上呢個病或者有親人患病都知道，諒解係幾咁複雜同痛苦。佢係一個傑出但複雜嘅人，言語有時同佢嘅意思不符。」並解釋過往未曾公開談論老公的精神健康問題，因怕影響家人：「我係非常保護我哋嘅孩子同Kanye喺健康方面嘅隱私權。」
Kanye不知是否受刺激，昨日又出招上載與家人舊照，照片中Kim與外母分別與他人交談，只剩下他一人呆坐，他又留言聲稱冇問題：「我認為Kanye並唔係唔穩定，佢睇嚟冇事但啲人卻標籤佢，令佢睇嚟好似笨蛋。」更批評外母Kris Jenner是金正恩及「白人至上主義者」。
雖然Kim與家人同樣被Kanye針對，但有指她目前沒離婚打算，希望陪伴老公一同度過難關。不過，另有指兩人其實已經進入離婚程序幾星期，兩人認為婚姻已經不能挽回。而一班圈中好友與Kanye的兒時好友，連日來飛抵懷俄明州探望他。