楊明戴罩做騷化妝化一半

楊明和女友莊思明、曹永廉等前晚為主演的電影《時代》，在隆亨邨的餐廳取景，談到該邨有多宗確診個案，莊思明說：「係有少少擔心，但冇辦法，呢度係部戲嘅其中一個主景，都避唔到，惟有自己小心啲，未埋位時就唔除口罩，不停用酒精搓手液搓手。」

燉湯生意跌4成

莊思明和楊明開設的燉湯店，面對晚6朝5禁堂食令，生意下跌4成，莊思明說暫時晚市只做外賣，楊明說：「初步估計跌咗4成，但仲未到月底埋數。（如果再進一步全日禁堂食？）我相信周圍都好慘。（你哋嘅預算仲可以頂到幾耐？）我哋攞到政府兩次資助，應該都可以頂到今年，但一定要搞掂咗疫情先。」

楊明承認在疫情出現第三波前，個人防疫措施是有點放鬆：「依家成套消毒用品又再出動，同埋勤洗手。（其他工作有冇延遲？）本身應承咗朋友去書展支持吓，但書展都延遲咗，暫時只係拍呢套戲，同埋之前做咗TVB個Show。大家都做足安全措施，on show照戴口罩，第一次戴口罩做show，嗰次就慳水慳力，化妝只化眼上面。」

莊思敏直播被攻擊

另外，參演《時代》的莊思敏近日頻頻開網上直播，她日前在直播中自爆高峰期月入五位數，又說要不停找話題，故做直播真的不易外，又說曾被網民惡意攻擊，她說：「話我：『點呀？依家冇嘢撈呀？變成一個網上乞兒，要上網乞禮物。』所以心理質素要好，惟有當睇佢唔到，唔通同佢嗌交咩！」