馮盈盈戲屎捱鬧忍淚繼續拍
馮盈盈自爆拍劇時被導演開咪鬧爆，事後忍着眼淚繼續開工，其拍檔黃嘉樂表示若導演有理據鬧人，作為新人應該多謝對方。而劉佩玥自嘲面皮厚，就算被導演鬧，當對方塞錢入袋。
前港姐冠軍馮盈盈於無綫節目《#後生仔傾吓偈》自爆被導演鬧到差點喊，據知，該場戲是她首次參演劇集《果欄中的江湖大嫂》，飾演黃嘉樂的妹妹。盈盈說：「有次開廠，講我認番一個好耐冇見嘅哥哥，跟住導演就開咪話：『盈盈呀！唔啱呀！再做過！』我當時開始緊張，之後要嚟多個Take，導演有啲情緒咁話：『馮盈盈你識唔識呀？唔係咁做呀！你到底知唔知做緊啲乜呀？』」
劉佩玥：當塞錢入袋
黃嘉樂昨日受訪時表示：「我覺新人被人鬧係一件好事嚟，咁樣成長先會快。嗰套係盈盈第一套劇，出嚟反應好好。喺我哋呢行做得耐都知，如果個導演係合情合理、因為戲而鬧你嘅話，你要真心多謝佢添。」而劉佩玥的想法亦相當正面，她坦言當演員最重要是虛心受教、接受批評：「其實肯話你、教你，都係『愛之深，責之切』，我自己可能夠厚面皮啦，人哋鬧我，我都當佢係塞錢入我袋。」
劉穎鏇：靚女冇優勢
新人何依婷坦言未試過被導演鬧，反而覺得自己做不到導演要求時很自責，怕連累大家，有一種無力感，故事前會綵排多次，盡量減少NG。而劉穎鏇坦言樂意被人鬧：「自己中文唔係咁好，所以每次拍攝都想多啲人畀意見我，係好事，我又唔覺得靚女有優勢。」同樣講廣東話唔正的劉溫馨表示：「我好鍾意拍劇，事前會做好多準備，如果導演提出問題我會改，亦會向身邊嘅前輩學習。」