何雁詩貼錢任人揼
新冠肺炎爆發後不少地方禁飛，熱愛泰國的何雁詩慶幸在落閘前兩度返「鄉下」歎世界，其中一段旅程更是由未婚夫鄭俊弘親自計劃的求婚之旅，令她當場「開水喉」喪喊。為了跟陽光玩遊戲，她特意準備多套性感泳衣大騷噴血身材，實行異地大解放！
熱愛陽光與海灘的何雁詩（Stephanie）在三個月內兩次暢遊泰國，去年底先跟未婚夫鄭俊弘（Fred）蜜遊蘇梅島，相隔兩個月在疫情大爆發前趕上「尾班機」與家人同遊布吉，事後回想起旅程都大呼好彩。
泰國一直是Stephanie的旅遊首選，最吸引的莫過於「平到笑」的按摩服務，大讚超級舒服︰「同Fred去蘇梅島嗰個Trip都係不停搵地方按摩，仲要搵最平嘅。平時喺香港唔捨得使呢啲錢，去到就用盡時間，日日按到冇肌肉為止！」
阿F red有古怪 原來有得解！
不過，今趟旅程有項特別行程完美擊倒「揼骨」，就是由Fred精心策劃的求婚！Stephanie坦言全程被蒙在鼓裏，直至被Fred帶到泳池邊才得悉其「目的」︰「一開始都有懷疑佢點解咁主動幫手Plan行程，因為佢平時係乜都唔理。去到個地方好靚、好Private，覺得佢揀得好好！」全盤計劃看似天衣無縫，最終卻有一事「撻Q」︰「冇影到求婚相！因為當時得我同佢，佢掛住求婚，我就掛住喊。不過喺佢能力範圍內Plan到呢個Surprise，對我嚟講已經好感動，之後影番張自拍補數。」
難得去到充滿陽光氣息的勝地，Stephanie把握機會大騷天賦本錢，準備多套「戰衣」大戰多個泳池及水清沙幼的沙灘，別以為膚色黝黑的她泳術出色，她自爆只限日光浴及浸水！
學煮地道菜 巡視街市買食材
Stephanie還安排了一項貼心行程，就是與Fred一齊參加當地團學煮泰國菜︰「我哋好鍾意食泰菜，雖然Fred有份學，但佢主要係嚟叮囑我記住食譜，返屋企整畀佢食。依家日日都整香葉炒辣雞肉咁滯，呢方面我略勝一籌！」她指當日學廚一早就跟導遊去街市買食材，笑言因為有「翻譯機」在身，所以不擔心雞同鴨講︰「泰國街市比起香港嘅感覺更原始，現場有好多唔同形狀、顏色嘅香料，當時我未係好鑽研到啲香料點用，買齊嘢就返廚房開始煮。泰菜比想像中容易，某啲嘢都似中餐，所以唔難掌握，仲學識切雞胸要跟住啲紋嚟切，會滑啲！」她笑言現時晚晚臨瞓前都會上網睇煮食片「惡補」廚藝︰「婚後我應該係煮最多，所以要努力鑽研。」