王君馨樓都唔買！ 攞首期追Sing夢

王君馨自爆攞「大過6位數」私己錢做歌手，好彩有老公支持。

花上半年時間籌備及推出新歌《Casada》的Grace，昨午於西九文化區舉行新歌MV發布會，一眾圈中閨蜜包括岑麗香（香香）、蔡思貝、鍾舒漫及鄭欣宜等現身支持，昨日還是Grace與老公Daniel結婚三周年紀念，他捧着大束鮮花送給太太，公開送「肉咀」放閃。

談及今次推出新歌，Grace直言用了「大過6位數」私己錢去追夢：「同老公講唔買樓住，佢都好支持我去追夢，覺得夢想要去實現，唔可以放棄。嚟緊我仲會再出多幾首歌，可能MV會愈嚟愈揼本，要愈拍愈靚！」她又透露發布會後會與大班朋友食飯慶祝結婚周年，二人世界則留待明天。談到丈夫的體諒與支持時，她公開示愛：「佢真係好好，仲幫手煮飯執屋，畀100分，冇得扣喇！」

結婚三周年，梗係咀啖先！	蔡思貝微露事業線，搶晒岑麗香Fo。	胡曦文的手錶品牌受女星愛「戴」。

• 王君馨舉行新歌發布會，大班姊妹撐場。

鍾舒漫離巢 冇乜壓力

撐好友場的鍾舒漫決定離開加盟了15年的經理人公司英皇娛樂，9月便回復自由身。談到日後路向，她以「Explore（探險）」來形容：「想試吓唔同嘅嘢。（冇咗大公司支持，會唔會好難做？）依家社交媒體咁發達，會有好多途徑嘅，即使自己作曲應該都唔會花太多錢，經濟冇乜壓力。」同場的胡曦文去年12月創辦的手錶品牌反應相當好，一度賣斷市三個月，更獲女星包括范冰冰等愛戴，不時榮登國際雜誌封面，但她表示生意在疫情下亦受影響。