謝東閔認分居甩朱智賢
藝人謝東閔昨日現身電台，宣傳無綫熱播劇《殺手》。提到偷食人夫黎振燁而遭雪藏的女友朱智賢時，他語氣平淡表示已跟女友分居，現與家人同住，似暗示完成當日陪伴女方渡難關的「任務」後，關係就「Game Over」！
「留番畀佢講」
他表示與朱智賢各有各忙，只間中見面：「留番畀佢自己講，唔代佢答啦。（講到關係咁生疏？）唔係，純粹係唔知佢想唔想我講，畀番佢自己交代。（有一齊追睇新劇？）唔知佢有冇睇，冇問有關工作上嘅嘢，我就每晚返屋企重溫。（佢有話悶到發霉？）要做有好多嘢可以做，例如行山、做運動、煲劇，之前我哋有一齊去Gym Room。」
當轉話題談及《殺手》，他即放下「戒心」，興奮表示多年前首次拍劇已與黎耀祥合作：「嗰時拍《法證先鋒Ⅲ》，我乜都唔識，有請教佢。」並劇透其角色到後期有重大轉變：「亦正亦邪咁，題材又鍾意，我好鍾意睇打鬥、血腥戲，但今次畀人打多。」
同成人玩具談情
他又透露正拍攝新劇《刑偵日記》，飾演患精神分裂的孤獨精，會跟塑膠成人玩具公仔發展一段單純愛情：「當佢真人咁照顧。（要毛手毛腳？）又冇，不過同死物對戲都幾得意。（驚抽離唔到角色？）抽離唔到唔緊要，可以拎返屋企，之後賣咗佢，哈哈！」