黃宗澤「虎」盡甘來床戰陳瀅
苗僑偉與黃宗澤昨日為邵氏新網劇拜神，黃宗澤於新一輯《飛虎》繼續享艷福，與陳瀅有咀戲兼床戲，苗僑偉「葡萄」地笑說：「啲靚女、咀戲畀晒佢啦！」
邵氏網劇《飛虎之壯志英雄》演員苗僑偉、黃宗澤、吳卓羲、張兆輝、陳瀅、蔡思貝、姚子羚和朱晨麗等昨日在觀塘進行拜神儀式。《飛虎》系列拍到第三輯，苗僑偉笑謂將會長拍長有，黃宗澤即說：「好似《愛．回家》處境劇咁拍落去，三哥（苗僑偉）話開就開啦！」
二人指今輯動作場面如槍戰、埋身肉搏戲比之前更多，問到在酷熱天氣下可應付得來，苗僑偉笑說：「中暑呢啲就冇得小心，話中就中，惟有飲多啲水。反而呢排突然間啲膝頭痠痛冇咗，生理上有啲變化，可能係迴光返照！」黃宗澤透露劇中與陳瀅除了有咀戲，更加有床戲，苗僑偉恨到出口：「我就唔知有冇？」說到黃宗澤與吳卓羲曾提議由高層樂易玲配搭苗僑偉拍感情戲，苗僑偉笑說：「咁大件事？要佢粉墨登場？唔係嫌棄，驚佢辛苦啫！」
蔡思貝吳卓羲玩悲情
至於蔡思貝與陳瀅首次拍攝飛虎系列，劇中同樣有不少動作場面，蔡思貝扮演飛虎，與吳卓羲有一段悲慘感情線，被問到可要為動作戲操fit？她笑說：「我要搵番條腰，因為拍《踩過界II》裏面不修邊幅，依家要做番Gym同埋拉筋為動作戲準備。」陳瀅則飾演O記Madam，與黃宗澤一對，動作戲是拍劇以來最多，她表示近期要練手指力，為開槍戲做準備：「有場戲仲要着住一條性感裙去打，今次啲動作戲有啲難度。」