「黑妹」陳凱詠被歧視 反擊旁人太無知
獲「校長」譚詠麟欽點、由主播成為環球力捧歌手的陳凱詠（Jace）天生皮膚黝黑，自爆小時候曾被歧視，有幼稚園同學仔取笑她：「我哋班嚟咗個非洲嘅同學呀！」升讀中學後又有同學問：「你咁黑，係咪賓妹嚟？跑步你實跑得最快啦！」
不過，Jace與這班同學至今仍是老友，她笑說：「細個我係黑到咁嘅，唔怪得佢哋。嗰時點解咁樣講嘢？點解要用我嘅膚色去笑其他種族同埋我呢？我覺得所有嘢係錯晒，點解審美觀係要用一個人嘅膚色去決定？因為細個嗰陣我哋係無知嘅，佢哋覺得搞笑，嗰刻唔覺得係種族歧視，唔知原來咁會傷害到人哋嘅自尊或者心情，係出於無知，但無知可以係無辜，不知者不罪，所以我冇太唔開心。」
難為打燈同事
Jace笑言膚色遺傳自父親，父母以往每年都會帶她去泰國旅行：「好似曬燈咁補一補，黑嘅人曬完唔會紅或者甩皮，係直接變黑，黑完永遠唔會白番！」她表示近年已經少曬太陽，但會用防曬，因為明白化妝、影相或拍戲時，打燈同事的苦處：「有導演講過剪片時，要將我同隔籬個女仔分開調色，因為我太黑！之前同Yanny（女子組合Super Girls成員）影相，佢好似反光板咁，顯得我仲黑，真係好難搞。」
被批三分鐘熱度
談到新歌《天生二品》，她指每個人都是獨特的，但自揭壞毛病：「成日質疑自己，唔知點解對自己好嚴苛，覺得做得唔夠好而唔鍾意自己。」她坦言入行前曾被朋友彈她不適合做歌手，認為她做事只有三分鐘熱度：「嗰啲所謂難聽說話，『你都唔夠靚、咁鬼黑o架、咬字唔知唱乜、扮晒跳舞叻』，都冇乜所謂，影響唔到我。」