Cheronna探靈後咳到甩肺

Super Girls成員Cheronna昨日為盧頌恩（妹頭）主持的香港開電視節目《30分鐘大放餸》擔任嘉賓，見她有幾聲咳，她自爆三星期前拍攝靈探節目後開始不舒服：「我氣管敏感，其實小學已經有呢個問題，但尋日po咗啲靈探相同片上網後，有人留言話感覺到嗰啲唔友善，唔知關唔關事啦！但我又唔覺有嘢跟咗我，只係咁啱之後唔舒服。」她表示咳到「甩肺」，扯蝦兼抖不到氣，很影響工作及唱歌，故現時轉食中藥及用哮喘噴霧，希望盡快康復。講到靈探節目，她坦言拍攝時很驚：「但我冇擺上面，喺嗰度好辛苦，有壓住嘅感覺，聽到啲嘢被推跌嘅聲，我哋問嘢時又有反應，同埋好難受，因為我有宗教信仰，但要唸咒語、燒衣紙同做招魂儀式，但都係另類體驗。」