子女整父親節蛋糕 胡諾言又亂又窩心

甫入店，芷苓已跟職員研究蛋糕款式，之後與弟妹分工合作，起初三人表現合拍，胡仔見狀亦有讚好，惟中途細妹見家姐「話晒事」，即向爸爸撒嬌「投訴」，弟弟也加入戰團，搞到胡仔一頭煙，及後他要重新分配工作，才合力順利完成蛋糕。

胡仔受訪時笑指子女於吹蠟燭一刻最開心：「佢哋讀書之後成日做勞作，我年中都收唔少，大女試過用報紙整隻狗仔畀我，好有紀念價值，到依家都擺喺屋企。」細女芷悠則說：「我諗住整煲呔，但佢唔買魔術貼畀我，所以唔整喇！」澔錕亦唔執輸，嚷着有禮物送給爸爸：「我要送大人嘢，係好大嘅屋企，有滑梯嘅，下面可以游水。」三子女更輪住送吻，令胡仔甜在心頭。