懷孕4個月的歌手吳若希昨日接受鄭裕玲訪問，笑言冇底線任問，問到可會再爆老公Alex大鑊？她即打趣指對方正趕來監場：「成日都好想佢接受訪問，講我係點，淨係知佢最叻話返到屋企會鞭打我，哈哈！」
喜事浪接浪，她宣布推出新碟，封面相是齊蔭舊髮型，她指是多年前遠赴巴塞隆拿影結婚相時順道拍攝，記者笑指背景似石澳，她即哈哈大笑︰「證明老闆覺得我係有說服力，唔使靠個背景，入面啲相係近期啲，喺台灣影，依家可以出碟除咗興奮之外，更係感恩。」她透露會宣傳至月底，之後開始放產假：「今胎真係辛苦好多，呢個星期開3日工就好想『射波』，休息唔夠，尋日都暈一暈，今朝打畀中醫師問點樣快速補充體力、減輕頭痛。（拍唔到《姊妹淘》？）拍唔到啦！」