蘇韻姿自誇旺夫 有「婚」唔怕遲

蘇韻姿當年由家鄉加拿大來港參加《香港小姐》，最終奪得第4名，繼而加入無綫。一直夢想做演員的她願望成真，更有幸參演處境劇《愛.回家之開心速遞》，憑「熊心如」一角人氣急升。

本以為靚女不乏追求者，但無論劇內劇外，她都是「單身狗」，但她不心急找男友，即使遲婚亦沒所謂：「想事業有啲成就先！可能好多人覺得男仔先有呢個諗法，但我覺得男同女都要有少少自己嘅成就，先可以去結婚。（唔驚40歲遲婚？）依家30歲先係新嘅20歲，40歲就係新嘅30歲，唔使驚！屋企人就有少少擔心，叫我唔好成日掛住做嘢，叫我諗吓將來。（介紹男仔畀你？）好在媽媽喺加拿大，所以介紹唔到男仔畀我，哈哈！」

蘇韻姿自覺有「旺夫運」，過去合作的拍檔都大受歡迎：「好似阮政峰同張明偉咁，佢哋兩個都紅起咗，依家仲做埋『CP檔』，仲有梁証嘉咁。我每次喺社交網發文，網友都唔係問我點，反而係留言問佢哋點，所以其實佢哋受歡迎過我！」

獎項提名當鼓勵

拍劇短短3年，除得到大家支持外，其演技亦備受肯定，去年更有份提名《萬千星輝頒獎典禮2019》的「最佳女配角」，雖然最終落敗，但已是最佳鼓勵，她說：「我讀咗咁多年書都係關於演藝，唔多唔少對演藝工作有熱誠，但我覺得自己未係完美。有提名係好好嘅鼓勵，好似叫我唔好放棄，叫我加油，無論有冇獎攞，我當時都冇去諗，只係覺得揀啱呢一份工。」

拍片留住Fans 搵姜麗文唱歌仔

不少藝人開設網上頻道拉近與Fans的距離，蘇韻姿亦不例外，不時與《愛》劇拍檔周嘉洛及吳偉豪等拍攝日常生活片段，更一手包辦剪接，非常認真！她說：「16歲開始拍片，但唔係好識，依家就認真少少去自學，希望帶畀大家Homemade嘅感覺，等大家透過唔同渠道認識我哋多啲。」她亦希望與好友姜麗文合拍唱歌片：「因為佢係一個好專業嘅歌手，我有同佢傾過，因為佢喺音樂方面好叻，比我強好多！」