挑戰入行最苦黃翠如演到虛脫
性格十足「傻大姐」的黃翠如，與蕭正楠婚後甜到漏，但在新劇《那些我愛過的人》中卻要挑戰演過最苦的角色，喪夫兼獨力照顧女兒與家庭。
自嘲「唔叻」
鮮有感性演出的她說：「拍攝嗰幾個月真係好苦，但亦都好好彩，拍之前休息咗兩年，上過戲劇同心靈堂，人生亦經歷過高低起跌，成長咗好多，加上結咗婚，咁先覺得自己夠資格去理解角色。」
一直期待突破自己的翠如，坦言收到劇本時相當震撼：「期待咗呢啲角色好耐，過去多數做傻大姐，今次演繹一個有歷練嘅人，可以跳出框框，所以真係好感激，聽劇本已經感動到喊！」不過，演繹今次角色的難度相當大，尤其翠如用真感情演出，有苦自己知：「我唔係一個好叻嘅演員，有啲演員好叻收放，但我就係功夫唔夠，情緒一爆就爆，所以有啲位真係虛脫，拍到好難過、好心痛，需要時間平復，就係因為我唔叻。」
劇中與女兒相依為命，翠如坦言「兩母女」建立了密切關係，問可有計劃與蕭正楠生番個？她笑說：「我係一個冇計劃嘅人，拍緊劇就專心去開工，我哋兩個都好率性，會好好珍惜依家。」