張紋嘉茶記偷師變「地獄廚神」
歌手張紋嘉（Crystal）最近擔任飲食節目主持勁食茶餐廳名物，還親自下廚炮製美食，雖然得到高人指點，但仍洋相百出，暴露「地獄廚神」本色，甚有自知之明的她表示無意開食店，卻有興趣製作食物售賣。
張紋嘉主持的飲食節目《茶餐廳龍虎榜》將於本月13日起，逢星期六晚上9時30分在免費電視77台香港開電視播出。
Crystal邀請了劉沛蘅等好友現身節目，一齊食盡香港茶餐廳的經典美食。她更向大廚偷師親自炮製茶餐廳風味食品。Crystal坦言為拍今次節目而增磅不少：「一日食足三大餐，分量比平時食多好多，重咗約4磅，對我嚟講已經好多，因為我係好難減肥嘅人，不過接拍前都預咗會肥，所以拍之前減定肥，拍完再減。」
畀菠蘿包考起
平時鮮有下廚的Crystal難得走入廚房偷學秘技，不過，她自嘲沒有烹飪天分，拍攝時發生不少蝦碌事，可謂地獄廚神：「完全失敗！打蛋又打爛，整菠蘿包又同人哋差好遠，雖然我對飲食開始有興趣，但煮嘢唔叻，加上太困身，所以唔會開食店，但會想喺食物工場製作月餅或者麵攞去賣。」
Crystal今次與好友邊食邊敍舊，笑言大有時光倒流的感覺：「第一次試飲牛肉茶，大家都覺得個味好古怪，即刻諗起以前一齊食飯，會去食啲古靈精怪嘢，有次食芝士，當時細路女唔識嘢，亂咁叫，有啲係好羶好大陣味，完全唔啱胃口，食咗一啖就冇食，嗰餐唔止貴，又浪費食物！」
劉沛蘅「雀仔胃」三心兩意
Crystal跟劉沛蘅（Hillary）數年前在一個戲劇課程中認識，她笑言平時見Hillary靚靚女女，但私下非常得意又搞笑。二人在茶餐廳試食經典常餐及滑蛋飯，Crystal指Hillary雖然鍾意食，但不太適合做飲食節目嘉賓，她解釋：「佢同我一樣係『雀仔胃』，食得好少，我要幫佢食埋，所以要搵食得多嘢嘅嘉賓。」她指二人除了胃口細之外，亦同樣是三心兩意之人：「我哋好鍾意食常餐，但有時會有選擇困難，佢試過落單時將個餐嘅配搭改晒，面目全非，我經常落單時明明叫A餐，但叫完又會改變主意。」