鄧佩儀唔敢戀馬國明：驚襯唔起佢！
藝人鄧佩儀（Gloria）於無綫熱播劇《降魔的2.0》中飾演「千金小姐」施萊斯，與「精靈」胡鴻鈞吻戲連場成熱話，她卻表示最難忘反而是戲中親情線：「今次同麥凱程演感情好好嘅兩姐弟，現實中我同哥哥都好Close，將呢份感情融入角色內。」
媽咪陪哭兩個鐘
Gloria難忘其中一場戲，交代麥凱程因健康問題陷生死邊緣，她在旁不斷爆喊，很多網友對該場戲有讚冇彈。回顧人生路，她直言「最悲傷一次」時發生在18歲，情景至今歷歷在目：「嗰次係唯一一次唔開心嘅，我連續喊咗兩粒鐘，媽咪見到我咁都坐喺對面一齊喊，好心痛見到媽咪為咗我不停咁流淚。直至依家拍喊戲，只要諗番當時就會好有感覺。」但拒透露發生何事，只淡然說：「總之問題最終係解決到嘅。我只可以話呢七年嚟都冇再咁喊過，嗰次係我同屋企人嘅唯一一次，令我明白到人原來有咁多淚水！」
今次拍戲遇上馬國明，未入行前是電視精的Gloria嘆「失望而回」：「我同佢得場食飯戲！真係緣慳一面。試過有日留咗喺現場睇佢開工，佢嘅演技令我眼濕濕，希望日後有真正合作機會。（想同佢演乜關係？）乜都得，最緊要有多啲對手戲，但未敢諗扮佢另一半，驚襯唔起佢。」