陳奕迅銀紙攝襪防同學「打劫」
外界都以為歌神陳奕迅從小讀名校，但他在社交平台上載短片，自爆原來讀過一間「爛仔學校」！他笑言本打算中三才到英國升學，但因學能測驗成績欠理想，升中時派到第7志願：「爸爸對我太有信心，覺得頭5志願會入到，之後嗰啲就亂填。」
他透露班中兩個「金毛」同學，每天向他「籌旗」：「佢哋食煙，嗰時10蚊一包，所以我將買零食嘅零用錢攝喺襪，散銀就放袋，對佢哋嚟講，拎到我3蚊已經好好。」他又記得有次放學聽到磨刀霍霍的聲音：「行到落去，見到兩個哥哥有啲報紙夾喺腋下，去到樓梯中間已經聽到『霍霍聲』，媽咪即刻叫我快啲上車！」最終他讀了一個月便沒再返學。