黎振燁勒住唔敢追多個
黎振燁因偷食事件，好老公形象盡毀，幸他及時醒覺，並得到太太原諒。昨晨其妻剖腹誕子，他寸步不離守候，非常緊張，直至得知母子平安才放下心頭大石！他原本有再追小朋友的計劃，但現時因經濟問題，只能容後再算！
藝人黎振燁於無綫原本發展不俗，可惜早前被揭偷食劇集《食腦喪B》拍檔朱智賢，令二人形象直插谷底。事件曝光後，黎振燁知錯跪求老婆，成功獲原諒，更經常陪老婆做產檢，做回好老公。不過，早前黎太產檢時驗出BB臍帶纏頸，令兩公婆非常擔心，並擇定昨日剖腹生子。兩人前晚入院，黎振燁徹夜陪太太，直至昨晨開刀，當得知太太順利誕下兒子，母子平安後，他才鬆一口氣！首度當爸爸，當然興奮，他在BB出世後不久，即隔着玻璃父子合照，並分享到私人社交網，與友人分享喜悅！
親手剪臍帶
據知，黎振燁的兒子於早上10時多出世，重近7磅，他親手剪臍帶，感覺相當奇妙，而太太見到BB一刻，更開心到喊，在場醫護人員指BB似爸爸，又指BB是大頭仔。本身喜歡小朋友的黎振燁原本計劃為兒子添細佬或妹妹，以互相陪伴，但現時因經濟問題，坦言想追都未必咁快。
對於當上爸爸的心情，他接受訪問時說：「開心、緊張、興奮。（會唔會留院過夜陪太太？）有需要會。（識唔識湊B？）有一定經驗，因為屋企人有小朋友。（改名未？）未諗。」至晚上7時許，黎振燁離開醫院時說：「前一晚瞓得唔係咁好。（BB點？）足月出世，一切正常，太太麻醉藥啱啱過咗，有啲攰同只能食粥，佢想嘗試餵人奶。（幾時出院？）未知。」