古天樂籌備電影救市演出賣關子
「影帝」古天樂昨日在銅鑼灣出席護膚品活動，談到英皇電影與其天下一電影公司計劃未來兩年拍10部港產片幫助電影圈，他說：「籌備緊，有好多唔同因素，好似依家外景拍攝有『禁聚令』，唔想拍拍吓停、損失，所以要睇疫情發展。」問到何時開拍？他笑言：「其實我都係聽公司啲人講。（你會演出？）我返去問吓公司先。（你係老闆喎！）邊個講o架？」
多時間休息煲劇
有指他與曾志偉等正籌備開拍類似《豪門夜宴》的電影幫助業界，傳聞邀任達華、張智霖等演出，於8月上映，他說：「適當嘅時候會公布，好多大家聽番嚟嘅唔係真。（疫情下身兼多職好煩惱？）疫情下有好有唔好，好嘅係多咗時間休息，喺屋企煲韓劇《愛的迫降》、《夫妻的世界》，唔好嘅就非常多，唔止個人，係全球、成個社會、成個業界都受影響。」
古天樂又指演藝人協會及15個屬會收集不少業界人士受影響的個案，並已處理，稍後會公布。對於導演鄭保瑞戥他被批評賺「人仔」來投資在港開戲感不值，他說：「冇睇，我一向做嘢都係用心做好每一件事。」