陳庭欣㷫合合熱到換底底
藝人陳庭欣日前於街頭拍攝新劇，由於天氣酷熱，她拍到汗流浹背，休息時拿着手提風扇降溫。她笑言「內外」全濕，帶多一套內衣褲替換。
陳庭欣（Toby）、麥美恩（Mayanne）及張嘉兒，日前到上環為無綫劇集《陀槍師姐2020》拍外景，Toby表示戲服多數是秋冬裝，故拍攝時分外辛苦，前一日拍到內衣褲濕透：「我之前着住套絲絨西裝拍攝，熱到由內到外都濕晒，今日帶多咗套內衣褲嚟換，仲搵番年幾冇用過嘅風扇仔出嚟。之前拍《多功能老婆》凍到飛起，今次就熱到飛起。（有冇試過熱到中暑？）咁又冇，我記得最熱係選港姐時去印度拍外景，不停流汗，妝都補唔到，仲要着住件風褸，真係好難忘。」她笑言現時最開心是在廠內主持《東張西望》：「我以前會嫌冷氣凍，但依家唔會再講。」
張嘉兒記性差
至於Mayanne與嘉兒飾演閨蜜，二人表示早已認識，雖然首次合作，但很快便進入「閨蜜狀態」。超過3年冇拍劇的嘉兒坦言初時不太習慣：「唔知係咪生完小朋友記性差咗，對白入唔到腦，好彩Mayanne同宣萱唔會話我，後來Warm Up咗就冇問題。（小朋友有冇唔捨得你？）有，每次出門口都好唔捨得，又會傳啲喊樣嘅短訊畀我，我都好掛住佢哋。」並多謝老公代她照顧兩個小朋友：「老公在家工作，但佢要照顧小朋友都做唔到嘢，咁我都好識做，返到屋企會讚佢。今次拍劇好開心，希望可以再拍。」
麥美恩想演出自然
Mayanne認為拍劇有助主持工作，又指在宣萱身上學到情緒及語速的運用。問到會否想挑戰演跟真實性格截然不同的角色？她說：「我練好呢個先，想演得舒服自然，睇吓大家對我演出嘅反應先。」