藝人楊玉梅昨日在街頭向市民派花，笑言未有資格做媽媽，但很享受慶祝母親節：「出門嗰陣已經同媽咪講咗母親節快樂，夜晚會食飯慶祝，仲準備咗花、蛋糕同禮物。雖然禁聚令放寬，但我哋齊人都要分兩枱食。」
同場的黃竣鋒透露將到福建及橫店準備開工，屆時會自我隔離14日。他坦言疫境時期手停口停，幸好早年接拍由王晶執導的電影有可觀收入，可暫且靠積蓄過活，又自爆老婆及三個小朋友「叮囑」他要長命：「佢哋喺大年初一叫我唔好病、唔好咁快死，經濟壓力太大，話我病唔起。聽落得啖笑，但諗深一層好得人驚，差啲要借錢。」
