鄧穎芝插爆猥瑣男 借教武非禮

鄧穎芝（Vangie）昨日轉載網上瘋傳的一批照片，相中疑男教練分別向女學員前後熊抱、身貼身及逼埋牆，男女之間肢體零距離，男子雙手更似觸及女子的敏感部位。Vangie留千字文炮轟相中男是「人渣」，質疑其「教授之法」的真正目的：「專業嘅教練識得尊重和避忌，佢哋亦會有相應嘅訓練以盡量少嘅身體接觸嚟教你，如果要掂到你都會問一聲先，當有可能要掂到你啲比較敏感嘅部位，會用其他嘢代替手，唔會直接摸你，更加唔會咁樣壓你埋牆，成個身貼住你，你覺得唔舒服已經係界線。」她續指即使女事主驚到不識鬧人，也應該要走人，不應再受騙。

Vangie狂鬧該疑似男教練，表示「猥瑣佬，望佢快啲去死」，指他利用別人的信任去滿足其淫慾，簡直禽獸不如，呼籲認識該人及受害者現身齊指證其惡行。她續說貼文後，曾收到涉事女子的求助電話，表示不明該批相為何外洩，又因怕招嘲笑而曾打消報警念頭，但經Vangie安慰及開導後，對方表示願意報警，而Vangie亦應求助人要求，召集了多名受害者向有關人士作出追究。

「過來人」倍覺激動

Vangie接受訪問時表示，如此激動全因自己亦是「過來人」：「我喺泰國受訓時，曾經遇過類似情況，當時冇做正確嘅處理，依家已經唔可以再追究，所以睇到呢啲事好嬲！」又謂相中男子借教武術疑非禮女事主：「其實嗰個人係透過演員討論區叫人嚟試鏡，聲稱有演出機會同酬勞，可能啲女仔想入行，但嗰個人又唔畀錢，話要下次先畀囉！」她表示目前收到3名女士求助，當中一人不願報警，現正聯絡社工陪受害人於今日到警署報案。