太保「慶功」後板起塊面
出爐金像影帝太保（張嘉年），早前宣布獲獎一刻，他正開工拍攝微電影《蝦條哥失業第七十八天》，全場工作人員即時大叫，並捧出預先準備好的蛋糕開心切cake，見慣大場面的太保知道得獎當然開心，但食完蛋糕突然板起面，原來是為保持情緒，因戲中他演一名嚴父，認真專業。
片中他與80後網絡紅人「蝦條哥」（阿峰）飾演父子，蝦條哥說：「知道太保哥喺戲中做我爸爸，我勁開心，終於可以專心做演員，喺宣布太保哥得獎時，所有人包括我在內，都好開心大叫。」該劇以疫情做背景，於屋邨拍攝，拍足12個鐘，講述疫情打擊各行各業，蝦條哥演活因為失業、生活逼人的都市人故事，電影講述他兩個半月來也找不到工作，他說：「每個月要畀4位數家用，又要還5位數卡數，太保哥係嚴父，但片中嘅阿媽就好錫我，就算收咗家用都私下畀番我，成個故事，畀到一啲我嘅童年回憶，感受到母愛，咁啱又母親節，我都要多謝媽咪嘅默默付出。」