呂方秘娶有米女友做老竇

現年56歲的呂方，曾與鄭裕玲拍拖16年，最終分手收場。感情生活備受關注的他，2013年被拍得與另一半伍惠寶（Rainbow）拍拖開餐，戀情正式曝光。雖然年齡相差16載，但無礙二人發展，感情一日千里，早前並拉埋天窗，現時Rainbow懷孕5個月，修成正果。

緊張刨育兒經

事業方面，呂方亦喜事重重，相隔5年再度成功申請紅館檔期，將於12月初舉行演唱會。面對成家立室、做老竇及開騷三件喜事，他亦未有怠慢，除忙於照顧太太起居飲食外，還不停操Fit以應付演唱會。

呂方受訪時坦言心情緊張又興奮：「人生走向另一個階段，學習做個好爸爸。」問到最欣賞太太甚麼？他說：「善良。（有冇睇育兒經？）有陪太太一齊睇。」又表示很多朋友得悉喜訊後紛紛致電恭賀，令他應接不暇。

Rainbow多年來一直深得呂方寵愛，2015年，呂方在演唱會正式公開女友身份。而二人對飲食和烹飪同樣甚有研究，Rainbow於2010年創辦網上買餸平台，以新鮮食材作招徠，生意愈做愈大，保守估計有數千萬身家，由於疫情關係，她現於獨立屋寓所安心養胎，盡量避免外出。