過來人羅霖：異地難維繫

藝人羅霖與大仔Nathan昨日出席網上音樂會錄影，提到鍾欣潼驚爆離婚，身為過來人的羅霖驚訝表示：「我估可能因為成日分開兩地，的確比較難維繫，我都試過，未結婚時同一個喺加拿大嘅拍拖，但好難維繫，當你好需要佢時但佢唔喺身邊，之前仲要淨係靠電話、寫信，依家又大引誘，所以如果我將來搵另一半，要搵喺身邊嘅。」同場的衛蘭則說：「覺得好可惜，keep住一段感情唔容易，要花好多心機。（佢哋閃婚所以易離婚？）聽過唔同case，要睇想唔想維繫呢段感情。（會唔會問候佢？）會text佢。（講咩？叫佢繼續努力？）哈哈，我冇資格講，我都要繼續努力，如果佢唔開心我會叫佢祈禱。」