馬德鐘張兆輝歸隊 黃宗澤凍薪效命
邵氏網劇《飛虎3》即將開拍，無綫「飛虎Icon」馬德鐘及好戲之人張兆輝都會「歸隊」拍攝。而黃宗澤亦已準備應戰，更笑言有工開已開心，不會加片酬。
邵氏《飛虎》系列劇集成績斐然，播映期間話題不絕，網上平台亦創下不少紀錄，第二輯《飛虎之雷霆極戰》鐵定於5月18日在翡翠台隆重首播，而第三輯《飛虎3壯志英雄》（暫名）亦籌備得七七八八，於5月底開拍，卡士方面除了原有班底苗僑偉、黃宗澤、吳卓羲、梁競徽坐鎮外，馬德鐘、張兆輝都會參演。而今次女主角就由邵氏力捧的陳瀅擔任。
馬德鐘向來是TVB「飛虎Icon」，今次正式「歸隊」坦言開心：「其實第一、二輯樂小姐（邵氏高層樂易玲）都有搵我，不過當時我拍緊大陸劇，所以拍唔到。自己都好期待，因為劇入面演員拍檔都係熟口熟面，相信合作會更有默契。」現時吃素的他，會否影響肌肉增長？他謂：「所以會多吃鷹嘴豆同藜麥呢啲健康植物，吸取蛋白質，希望狀況好啲。」第二輯開拍時，張兆輝因要拍《黃金有罪》而不能參與，故十分期待今次演出。
吳卓羲不敢怠慢
黃宗澤拍第二輯時傷腳，問到會否有陰影？他說：「陰影又冇嘅，依家隻腳已經康復咗九成半。」問再接拍有否加價時，他笑謂：「加價？依家有工開都開心啦！加唔加價呢啲樂小姐話事嘞！」吳卓羲受訪時說：「梗係要勤力操，對住佢哋呢啲強人，三哥（苗僑偉）唔使操都好Fit，我梗係要努力。」
而身在加拿大的陳瀅透露與苗僑偉、黃宗澤較多對手戲：「我拍第二套電影時已經同黃宗澤合作，嗰陣完全唔知自己做緊乜，勁怕醜，冇乜同佢溝通，咁多年後能夠有機會再合作都好開心。」