受新冠肺炎影響，紅館個唱全取消，包括許冠傑、張智霖、AGA等，寰亞歌手梁漢文（Edmond）昨日在社交網宣布將於十月底假紅館開第五次個人演唱會時，他打趣自問︰「我會唔會係香港第一個歌手喺紅館開番演唱會呢？」同時希望大家一齊集氣，望屆時生活回復正常，就可以在紅館相見。
為慶祝此天大喜事，Edmond決定大事慶祝一番，實行在開騷前「食爆佢」！片中見他先到超市掃薯片，再到小食店揀了墨魚、生腸，還鯨吞炸雞腿，相當和味！
Edmond受訪時表示可以開騷好開心︰「我哋應該抱住正能量去繼續生活，唔可以因為疫情就好似世界停頓咗咁，所以當初公司同我商量話想入紙，我都好贊成，點知紅館批咗，就當一切正常，努力籌備一個精彩騷，不過依家咩都未定o架，只係定咗個期，呢排開始約開會，仲錄緊新歌。」問到有信心開得成？他說：「我估唔係我一個人對疫情要有信心，全世界都要對疫情抱有信心，每一個人都希望可以返番去正常生活，所以我咪叫大家一齊集氣，希望好快香港日日零感染，我哋都可以正常生活。」不過，他坦言有兩手準備，如屆時疫情情況有異，將會另作安排。