熊貓眼印象深 薛家燕叫小豬跳十字步

薛家燕前晚偕林一峰等錄影節目《流行經典50年》，她主動提起小豬的桃色新聞：「藝人喺舞台上嘅精彩演出得到觀眾支持，但思維、道德觀念都一定要有原則，先會得到大家喜愛。」她認為小豬收入上必定有很大損失，一班支持多年的粉絲亦會流失：「係一面借鏡，尤其處身於娛樂圈，一舉一動都會特別受關注，真係要珍惜自己。」原來多年前她曾訪問對方：「佢好有禮貌，唱歌同跳舞都好好。我覺得佢個黑眼圈好黑，佢話嗰排好忙。（可能多運動筋疲力盡。）唔好做嗰啲運動，應該跟我一齊跳『抗疫十字步』，如果舞功咁用，真係陰功！」而林一峰透露原定3月底舉行的音樂會，現已決定押後至明年。