王菲煲劇學演技 讀報練發音
應屆香港小姐受疫情影響，演出機會相對較以前少！亞軍王菲坦言為避疫變宅女，近期多數留家：「好少約朋友出街，喺屋企煲劇、上網，試過一星期冇落街，不過又唔覺悶，因為由細到大都唔怕悶，喺屋企可以搵好多嘢畀自己做。」
問到可覺得運氣麻麻？她說：「出面活動係少咗好多，但公司好好，安排我哋上節目增加曝光，同埋吸收經驗。」早前狂煲熱播劇《法證先鋒Ⅳ》的她坦言想拍劇：「睇《法Ⅳ》覺得佢哋除咗好有型，記對白仲好勁，好想拍查案劇。我有懶音，趁有時間喺屋企讀報紙練發音。我未正式學演戲，惟有睇多啲電影，同埋喺屋企對空氣做戲，有諗過上堂學演技。」