郭富城入戲太深 喪咳憂患絕症

城城憑主演新片《麥路人》角逐今屆金像獎影帝，惟電影因疫情關係延期上映。他前晚與導演黃慶勳開Live大談拍攝花絮，片中他飾演監守自盜的金融才俊，出獄後「寄宿」在快餐店，最終患上重病。

他自爆當時太投入演出，一度懷疑自己身患絕症：「角色煙不離手，所以我食到咳唔停，工作人員勁擔心，仲提議我睇中醫。拍完後我成日覺得唔舒服，以為自己瀨咗嘢患絕症，直至睇咗醫生做身體檢查，報告出嚟證實身體好好先安心晒！」

城城太過投入劇情，自己嚇自己！

方媛做足防疫措施，帶埋媽咪、囡囡及家傭出巡。

自嘲雞蛋裏挑骨頭

鮑起靜飾演城城母親，劇情催淚。談到母子情，城城相當感觸，憶起早前離世的母親即不禁哽咽：「個角色令我感受好深，因為當時媽媽啱啱唔喺度。」並表示隨着年紀漸長，變得更感性：「戲入面好多鏡頭，依家睇番都好心噏。」在旁的黃導即輕拍他以示安慰。

城城透露5、6年前如廁時想出一條好橋，其後找人代筆，把故事寫出來並準備拍成電影，隨時圓導演夢：「不過我嘅性格係雞蛋裏挑骨頭，做導演嘅話，我諗會因為個景唔啱，又或者狀態唔好唔拍住，唔知要拍幾耐先拍完！身兼導演同演員會令我分心，依家都係做多陣演員沉澱吓，之後可能開始做導演。」

方媛一拖三出巡

談到細女「二寶」一歲生日，城城表示只買蛋糕在家低調慶祝，而近三個月都留家食飯，感謝外父做「煮飯公」，並打趣自己對烹飪毫無認識，要挑戰演廚師。另外，城城太太方媛日前帶同媽媽、囡囡及家傭現身中環一個商場，四人行剛好未有違反禁聚令。本來坐在BB車的女兒乘搭扶手電梯時落車拖實媽咪，之後眾人齊齊搭的士離開。