謝芷倫泳衣出征 磨損腰撞瘀膝

藝人謝芷倫（Jan）早前到布吉拍攝無綫節目《3日2夜》，罕有以泳裝示人大晒身材！向來做開運動的她，為節目玩足七日戶外活動，自爆期間多次受傷：「最記得我頭一日玩人造陸上滑水，邊練習邊拍攝，但有次跌嘅時候撞咗落氣墊，仲撞瘀咗膝頭，又磨損咗條腰，好彩我不停搽藥膏，抖咗陣就冇事可以繼續拍。點知另一日我唔使拍嘢，去咗沙灘行吓就唔小心撞到一支打橫生嘅樹幹，又成個人跌咗落地。」她又透露出發前剛考獲潛水牌，終可在拍攝時學以致用。