謝東閔爆朱智賢大食

藝人謝東閔昨日到電台受訪，表示會分享做運動的心得：「平時會睇吓點樣保養、物理治療、飲食嗰啲，睇吓點樣可以紓緩肌肉，因為我腰痛。（咁快睇定養生？）要o架，男人過咗30歲體能會走下坡，有時做運動姿勢唔好又會有問題。」問到可會捉埋緋聞女友朱智賢一起做運動？他說：「佢好懶做運動o架！但佢食好多嘢，食得多過我都仲係咁瘦。（會迫佢做運動？）有時都會，可能我同幾個朋友做gym，佢就同其他朋友喺隔籬做瑜伽，完咗就一齊食嘢。」講到他腰痛，可會叫朱朱幫手按摩？他笑言：「絕對唔會，好尷尬，我拉吓筋就得。」