朱智賢：第一次畀咗奶仔！
方紹聰日前為新劇拍攝向朱智賢（朱朱）示愛戲份，既行鮮花攻勢，又扮情場浪子自彈自唱，惟女方並未過電！朱朱表示現實中未遇過男仔浪漫示愛，如果有會好冧，更笑說：「呢個第一次畀咗奶仔！」
藝人朱智賢與方紹聰（奶仔）前晚在中環碼頭為無綫劇集《食腦喪B》開工，拍攝一場奶仔向朱朱示愛戲份，雖然出動鮮花及自彈自唱冧招，惟朱朱不為所動，還狠心「彈鐘」拒愛。
求婚睇誠意
朱朱透露現實中未曾有男仔浪漫示愛：「如果男仔咁做真係冧㗎！自彈自唱好浪漫。（緋聞男友謝東閔都冇咁做？）冇遇過喎！基本上唔會多男仔咁做，呢個第一次畀咗奶仔！（如果他日有人咁做向你求婚會點？）要睇呢個人有冇誠意。（你暗示叫謝東閔咁做？）又唔係，哈哈！」更指劇中與翟威廉、黎振燁及奶仔分別有感情線，問到可有親熱戲？她笑說：「又冇喎！呢啲留番畀何廣沛同江嘉敏啦！」
而奶仔則表示自彈自唱戲份難不到他，皆因以往不時與張彥博夾Band，問到現實中可曾向心儀女士憑歌寄意？他說：「試過母親節喺屋企對住媽咪唱《月亮代表我的心》囉！依家又冇拍拖，以前拍拖我都唔太浪漫，因為我個人好哲學，女仔可能覺得悶，所以都係搵啲一齊鍾意運動、行山同踩單車嘅對象咋！」