新冠肺炎全球爆發後，先後有多位名人紅星中招。憑百老匯舞台劇版《魔雪奇緣》（Frozen）中飾演安娜公主一角走紅的美國舞台劇女星Patti Murin，近日大住肚疑受感染！而天后Rihanna得悉老竇染疫，即火速寄了一部呼吸機給他，認真有孝心！
現年39歲的Patti正為老公佗B女，她前日於社交網站Instagram留言懷疑自己染疫：「我開始感覺非常攰同疼痛，發燒同咳嗽，令我感覺個頭從內到外分開，同婦產科醫生視像通話完之後，佢幾肯定我感染新冠肺炎。但我唔能夠接受檢測，除非我開始呼吸困難。」雖然懷孕期間染疫，但Patti表示自己有信心病毒沒法穿過胎盤，又表示現時母女平安：「我目前嘅情況好好，我發誓，個BB都係！我嘅子宮係目前存放『小花生』最安全嘅地方。佢（胎兒）依家幾乎每小時踢我一次，所以我知道佢一日比一日更強大。個世界目前好瘋狂，但唔會係永遠，大家記住呢一點。」Patti於2018年開始在百老匯參演《魔》舞台劇至今年2月，2018年劇組更獲邀在「舞台劇界奧斯卡」之稱的東尼獎演出，其夫Colin Donnell亦是舞台劇演員。
除了Patti之外，美國樂壇天后Rihanna的66歲父親Ronald Fenty前日受訪時自爆早前感染新冠肺炎。身在家鄉巴巴多斯的他透露女兒每日致電慰問他，並特地買了一部呼吸機寄給他，不過他一直不必用到。他透露染疫當時發高燒，感到很害怕，更認為自己會因此死亡。最後他花了14日時間在當地的隔離中心後完全康復，Rihanna亦當堂放心晒！Rihanna與父親原本關係惡劣，後來冰釋前嫌，重修舊好。
另方面，曾與甄子丹在《俠盜一號：星球大戰外傳》（The Star Wars: Rogue One）中合作過的墨西哥著名男星Diego Luna，前日於網上透露11歲兒子Jeronimo與9歲女兒Fiona先後染疫，幸目前已康復並獲准回家。