黃祥興賣肉求生金剛帶隊睇女
全球經濟不景，不少藝人工作大減，惟有諗計轉型搞噱頭。當中黃祥興與金剛齊齊搶佔「網紅」市場，拍片開拓商機，鋪路吸廣告搵真銀！
經營法國餐廳10年的藝人黃祥興，兩個月前再做老竇，為騰出更多時間陪伴小朋友，早前忍痛結束餐廳生意。曾在社交網揚言轉攻中餐的他，果然有生意頭腦，最近跟朋友搞鮑參海味食物包及凍肉生意，更做埋YouTuber，繼之前與女兒Paige父女檔教法文外，又教網民如何在家都有方便的鮑參海味食，望殺出商機！
祥興受訪時表示，所有短片都由自己一手包辦，問是否趁機吸引廣告商落廣告賺錢，他說：「係可以嘅，但一步一步嚟，要有好多Followers先。以前做餐廳，有好多朋友託我攞優質牛扒、羊扒，依家公司專做網上購物，主要針對食物，包括中式即食食品、健康湯包同打邊爐湯底等。」
公開甜蜜生活
同樣轉戰網上的還有金剛，他日前偕索女友梁云菲（Nana）到墾丁，趁假期齊齊拍片做YouTuber，金剛說：「好多Fans都想知佢同我私底下會做啲乜，咪拍啲片上網囉！（介紹台灣？）暫時未去到咁，依家想畀Fans知道我哋近況，如果之後有贊助，咁就當然會諗吓啦！」問到墾丁有甚麼好介紹，他笑說：「滑浪、潛水都有，墾丁就係陽光、沙灘同Bikini！（好多Bikini女睇？）係呀！呢邊着Bikini好正常，你着鞋、着長褲先係怪！」