摸龍床求財唔求囡 黎諾懿暫停播種
一向篤信佛教的藝人黎諾懿，日前專程到布袋澳的天后廟拜神祈福，花了約千元添香油、摸龍床等，求健康、添丁及財富。因為疫情嚴峻，他不論工作或造人計劃都大受影響，故特別往拜神祈福望疫情盡快過去：「手上工作好多都停咗，兩個節目擱置咗，農曆新年後嘅周年商演都冇晒。但我好幸運，年頭已收咗成年收入，拍咗四個廣告，代言又續咗約。」幸好他先搵未來錢「頂住」！
唔介意馬國明截胡
問到摸龍床是否想追個女？原定今年追B女的他不諱言要暫停「播種」：「龍床唔係只係求子，仲有求健康同財運，我都追女，但一直冇聲氣，不過算好彩，如果疫情期間有咗就大件事，所以我覺得個天好眷顧我，如果老婆懷孕要去睇醫生，出入醫院都會驚，暫時停一停，希望下年。」
黎諾懿又謂新春期間因拍《天天開運王》到訪過不少廟宇，今年祈福特別多：「之前同馬國明去長洲行山，行山之餘沿途都有廟宇，一路行一路入去拜，因為疫情，唔可以周圍去，當去郊外，又可以拜神、祈福。」說到原本由他主演的《BB來了》，續集換上馬國明，可有不開心？他笑說：「係囉，嬲佢搶咗我角色，其實識咗佢十八年，由奧運六星開始，依家得番我同佢喺無綫，年長咗識諗，有啲嘢係你嘅就係你嘅，我會想挑戰其他角色，相信佢會畀我做得更好。」